Buresboahtin fas gullat Risku-prošeavtta (RISKU = Rájehis sámi kultuvra) ođđasiid! Dán teakstaráiddu čállá Aino Valovirta, Oulu2026 sámi kultuvrra buvttadeaddji.
Dál Davviriikkain ávvudit Giellavahku, ja dasa sáhttá oassálastit maiddái Oulus. Nuortalašgielat Je’vida-filbma lea boahtán teáhteriidda, ja lean mielde Ealligovvateáhter Staris dan čájáhusas maŋŋebárgga 24.10. dii. 13.15. Boađe ságastallat sámekultuvrras filmma maŋŋá, sáme- dahje suomagillii!
Doalan maŋŋebárgga maiddái ”giellacavgileami” Pekuri girjerájus dii. 16.30–17.30. Lean ráhkadan dan várás oanehis sátnelisttu, mas leat sihke dábálamos frásat ja Oulu2026-sánit davvisámegillii. Daid sáhtát lohkat jo ovddalgihtii dás vulobealde. Jus máhtát lohkat dán teavstta, it sihkkarit dárbbaš veahki dieid sániid jietnadeamis, muhto buresboahtin dattetge girjerádjui háleštit muinna!
Giellavahku sáhttá ávvudit gos beare. Siiddus https://giellavahkku.org/ gávnnat giellavahku prográmma, ja Sámedikki siidduin leat tipsat ja gárvves materiála, omd. oahpistangalbbat sámegillii. Ja jus liikot filmmaide, Yle Areenas sáhtát geahččat Guovssahasaid ráppár -dokumeantta sámeráppár Mihku Laiti birra. Oahpásmuva maiddái dasa laktáseaddji bargobihtáide Koulukino-siidduin!
Giellavahkusge barggan dieđusge Oulu2026-sámesisdoaluiguin. Lean geasi ja čavčča áigge deaivvadan min ovttasbargoguimmiiguin Anáris ja Kárášjogas, ja čakčamánus oassálasten KulturSápmi-dáhpáhussii Anáris, gos ledje miellagiddevaš sáhkavuorut, čeahpes dáiddarat ja somás deaivvadeamit. KulturSápmi-cealkámuša sáhtát lohkat dáppe.
Dál lean plánemin prográmma Oului álbmotbeaivvi 2024 várás ja Budejjui, gos min Árktalaš festivála doaivvu mielde galleda guovvamánu álggus boahtte jagi. Jus leat jurdagat das, makkár sámekultuvrra háliidivččet Oulu2026-guovllus oaidnit, gullat dahje vásihit, cavgil munnje! Giittán váimmolaččat buot anolaš evttohusain, maid lean dán rádjái jo olbmuin ožžon, lasi oažžu sáddet munnje čujuhussii aino.valovirta@oulu2026.eu.
Máinnašan vel ovtta áigeguovdilis ášši: Open Call Sápmi Triennale várás lea jođus ja rabasin gitta skábmamánu 15. beaivve rádjái. Sápmi Triennale lea johtti čájáhus, masa ohcet dál sámedáidaga ja dáiddaduoji. Loga lasi dáppe.
