Bures! Mun lean Oahptii-Jovsset Ristena Máreha Aino. Lean bargan sámi kultuvrra buvttadeaddjin Oulu kulturfoanddas ođđajagimánu rájes ja koordineren Risku-nammasaš prošeavtta. Háliidan čalmmustahttit maiddái sámegiela, ja danin lean mearridan čálligoahtit iežan barggu birra teakstaráiddu, man gohčodan Risku-raportan.
Risku-namma boahtá sániin ”Rájehis sámi kultuvra”. Prográmma ulbmilin lea nuppe dáfus čalmmustahttit sámekultuvrra ja kulturoaivegávpotguovllus ássi sámiid ja nuppe dáfus fas buktit sámeservoša oktii, fállat sámiide vejolašvuođaid návddašit sámekultuvrras ja maiddái ráhkadit ja nannet fierpmádagaid, vai sámedoaluid livččii boahttevuođas álkit lágidit. Álgovuolggalaš prográmmaplána čállimin ledje ee. gávpoga, Giellagas-instituhta ja Oulu Sámit -searvvi ovddasdeaddjit, ja dál leat ollašuhttigoahtimin dan.
Dán rádjái lean oahpásmuvvan plánaide ja olbmuide, ohcan ruđa ja ovttasbargoguimmiid ja fitnan dáža bealde Budejjus (Bodø), mii lea okta Eurohpá kulturoaivegávpogiin jagi 2024. Bodø2024:s maid bargá sámekulturkoordinahtor, ja lei somá gullat sin sámeprográmmas. Vare beasašeimmet dohko sámedoaluide boahtte jagi! Dál lean vuordimin dieđu das, mo min vuosttas veahkkeruhtaohcamuššii geavai. Das muitalan dasto raportaráiddu čuovvovaš oasis…
Háliidatgo ieš oassálastit sámekulturprográmma plánemii dahje dan ollašuhttimii dahje gullat lasi? Váldde munnje oktavuođa, aino.valovirta@oulu2026.eu! Gulahallu!
