Dálvemánnu-festivála čohkke oktii sámeartisttaid ja kulturbargiid viiddes davviguovllus. Eurohpá kulturoaivegávpotprográmmii gulli ollisvuođa guovddážis lea sámi álbmotbeaivi, guovvamánu 6. beaivi.
Dálvemánnu vuolgá johtui Hildá Länsman & Tuomas Norvio -duo konsearttain kulturdállu Valves maŋŋebárgga 3. guovvamánu dii. 19. Länsman lea okta Sámi fámolamos lávluin sihke čeahpes juoigi ja luođi ovddideaddji. Norvio fas lea suopmelaš jietnadáiddár, komponista, buvttadeaddji ja multidáiddár. Ovttas videoartista Alice Marie Jektevikiin soai leaba ráhkadan modeardna konseartavásáhusa, mii rahpá poarttaid sihke mannan ja boahtevaš áigái.
Duorastaga 5. guovvamánu Oulu teáhteris dollet sámi álbmotbeaivvi ovdafeastta. Prográmmas lea vuos panelaságastallan sámiid duohtavuohta- ja soabadankomišuvnna rapoarttas, dan bohtosiin ja mearkkašumis diibmu 15.30 – 17. Maŋŋelabbot eahkedis, diibmu 19, Wimme & Rinne -duo doallá konseartta teáhtera Pikisalis. Wimme Saari máhttá bures árbevirolaš luođi ja dan lassin dulko dan iežas persovnnalaš vugiin. Saari ja musihkkár, komponista Tapani Rinne leaba bargan musihka ovttas jo badjel njealjádasjahkečuođi ja johtán birra máilmmi loaiddasteamen.
Sámi álbmotbeaivvi, guovvamánu 6. beaivve, dollet Oulus guokte konsearta: juoigi, lávlu ja neavttir Ingá-Máret Gaup-Juuso ja oululaš ritmamusihka čeavli, Oulu All Star Big Band, leat ovttastahttán vuimmiideaset. Davvi oktavuohta – Pohjoinen yhteys -skearroalmmostahttinkonsearta lágiduvvo Pohjankartano sáles diibmu 19. Prográmmas leat Sámi Grand Prix -gilvvusge menestuvvan Gaup-Juuso musihka ja árbevirolaš luođit, mat leat heivehuvvon big bandii.
Seamma eahkeda diibmu 21 Valves lávkeba lávddi ala AMOC & Áilu Valle. AMOC lea vuosttaš artista, gii ráppe anárašgillii. Áilu Valle fas ráppe dábálaččat davvisámegillii, muhto maiddái suoma- ja eaŋgalsgillii. Dál soai leaba ráhkadeamen skearru ovttas.
Lávvardaga, guovvamánu 7. beaivve kulturdállu Valves diibmu 18 loaiddasteaba Anna Morottaja & Tallari ja Suõmmkar. Anáraš Anna Morottaja, nappo Kuobžâ-Piäká Ánná, lea ealáskahttán livđe-árbevieru ja dál bargagoahtán ovttas legendáralaš suopmelaš álbmotmusihkajoavkkuin, Tallariin. Suõmmkar buktá oktii árbevirolaš nuortalaš musihka – leu’dd, katrilla ja nohkadanlávlagiid – ja modeardna máilbmemusihka. Konsearta gullá maiddái OMJ Jazz & Etno -konseartaráidui.
Eamiálbmogiid filbmafestivála Skábmagovat Anáris buktá Dálvemánnu-vahkus Oului golbma filbmačájáhusa. Okta dain lea mánáide oaivvilduvvon, davvisámegillii dubbejuvvon animašuvdna, nubbi sámi guhkes filbma ja goalmmát sisttisdoallá oanehisfilmmaid.
Dálvemánnu-festivála áigge Oulu dáiddamuseas fállet fiinna vejolašvuođa oahpásmuvvat sápmelaš dáidaga ja duoji stuorra Eanangiella-čájáhussii Wimme juigosiid bokte gaskavahku 4.2. diibmu 17. Sotnabeaivve 8.2. museas lea davvisámegillii oahpistuvvon tuvra diibmu 14.
Wimme & Rinne -duo konsertii duorastaga ja AMOC & Áilu Valle konsertii bearjadaga lea nuvttá sisabeassan. Báikkiid dieidda sáhttá várret Oulu2026-neahttagávppi bokte. Bileahtat eará konsearttaide vuvdet Lippu.fi-vuovdinkanálain. Liŋkkat leat dán artihkkala loahpas.
Mii Dálvemánuid?
Árbevirolažžat sámi jagis ledje 12 dievas mánu ja daid lassin mánnolahkki, oktiibuot 13 mánu. Okta dain gohčoduvvui dálvemánnun dahje garanasmánnun. Dál mii geavahišgoahtit dálvemánu bajilčálan, man vuollái čohkket máŋggabealát sámedáhpáhusaid.
Kulturoaivegávpotjahki nanosmahttá sámi kultuvrra
Oulu2026 sámi kultuvrra koordináhtor Aino Valovirta muitala, ahte sámekulturprográmma ulbmilin lea fállat máŋggabealát ja alladását vásáhusaid kulturoaivegávpotjagi ja oahpásmahttit olbmuid sámekultuvrra girjáivuhtii ja čábbodahkii.
“Oktan ulbmilin lea čalmmustahttit min kultuvrra ja kulturoaivegávpotguovllus ássi sámiid. Nuppe dáfus háliidit buktit sápmelaččaid oktii, fállat sámiide vejolašvuođaid návddašit sámekultuvrras ja maiddái ráhkadit ja nannet fierpmádagaid, vai dilálašvuođaid livččii boahttevuođas álkit lágidit”, Valovirta muitala.
Oulu2026 sámekulturprográmma dáhpáhusaide gullá maiddái Ovllá-opera, mas leat čájálmasat ođđajagi- ja guovvamánus Oulu teáhtera stuorra lávddi alde.
Suoma Kulturruhtarádju doarju Oulu2026 sámekulturprográmma, ja prográmma ollašuhttimin lea viiddes ovttasbargofierpmádat. Oulu lea Suoma stuorámus sámegilli. Suomas ássi sámiiguin badjel bealli ássá sámeguovllu olggobealde, sullii duhát sis Oulu2026-guovllus.
