Institut finlandais Parisas, Frankriikkas, lágida 11.9.–24.10. čájáhusa Gulahallat – gávnnadeamit sámi dáládáidagiin ovttasbarggus Eurohpá kulturoaivegávpogiin, Oulu2026:in.
Mielde leat dáiddaduojit ovcci sámedáiddáris: Tomas Colbengtson, Marja Helander, Niillas Holmberg, Jouni S. Laiti, Hildá Länsman, Tomas Magnusson, Outi Pieski ovttas Eeva-Kristiina Nylanderiin, Lada Suomenrinne ja Liselotte Wajstedt.
Sin dáiddaduojit – čuovgagovat, filmmat ja iešguđetlágan duojit – buktet oktii árbevirolaš teknihká ja dáládáidaga. Máidnasat muitaluvvojit ja dulkojuvvojit ođđasit, ja daid bokte dutket ovdamearkka dihte kultuvrra sitkatvuođa, gaskavuođaid lunduin ja gulahallama dološ áiggi, dálá áiggi ja boahtteáiggi gaskkas.
Čájáhusa siidoprográmmas beassá oahpásmuvvat sámi musihkii, biebmokultuvrii ja ealligovaide, ja Instituhtas lea maiddái pop-up-duodjegávpi.
