Mii leat kultuvra -prográmmaohcan
Niegut ovttastahttet – daga daid duohtan!
Ohcan lea rabas 2.9.2024–31.8.2025.
Kultuvra lea eallimis juohke sajis – dál sáhtát leŋget iežat hutkáivuođa buohkaid illun. Váldde Eurohpá kulturoaivegávpotjagi iežat árgabeivái ja feasttaid. Evttot iežat prográmma virggálaš Oulu2026-kulturprográmma oassin. Sáhtát maiddái ohcat čuozáhatdoarjaga prográmma ollašuhttimii. Mii ohcat máŋggalágan kulturdaguid, mat ollašuvvet oassin ávvujagi prográmma Oulu2026-guovllus. Ulbmilin lea lasihit kulturprográmma dahkkiid, sisdoaluid ja dáhpáhuvvanbáikkiid máŋggahámatvuođa.
Mii ávžžuhit aiddo du ollašuhttit iežat vildasamos jurdagiid – lehkos dat gođđojuvvon graffiti, ráidogovva, gáhttadánsundáhpáhus, agálaččat lihkadeaddji mašiidna, dáiddabargobádji dahje mii beare. Min doaimmaid guovddážis lea kulturprográmma, mas kultuvrra doaba áddejuvvo viidásit. Veahkkeruđa sáhttet ohcat buot kultuvrra dahkkit, nu organisašuvnnat go ovttaskas olbmotge.
Čájeheatnot ovttas, ahte kultuvra gullá buohkaide ja juohke beallai. Ále luoba iežat nieguin – oza roahkkadit mielde!
1. Evttot iežat prográmma
Prográmmaohcama bokte sáhtát evttohit iežat prográmma virggálaš kulturprográmma oassin. Dalle prográmmaevttohusat galget deavdit čuovvovaš eavttuid:
- Prográmmaohcama bokte ohcet erenomážit jahkái 2026 plánejuvvon prográmma.
- Ohcci nagoda vástidit prográmma ollašuhttimis ja dieđiheamis.
- Olbmuide oaivvilduvvon prográmmasisdoallu ollašuvvá jagi 2026.
- Prográmma ollašuvvá Oulu2026-guovllus.
- Ohcci čatnasa ollašuhttit prográmma sosiálalaččat ja ekologalaččat ceavzilis vugiin.
Ohcanskovi deavdima várás ohcci galgá čállit sisa Rimbert-vuogádahkii. Čáliheami oktavuođas ohcci galgá válljet iežas duogášorganisašuvnna. Molssaeaktun leat ovttaskas olmmoš, bargojoavku dahje organisašuvdna (searvi, foanda, almmolaš doaibmi, fitnodat).
2. Sáhtát ohcat čuozáhatdoarjaga
Mii leat kultuvra -prográmmaohcama bokte lea vejolaš ohcat čuozáhatdoarjaga.
Ohccin sáhttet leat searvvit, foanddat, ovttaskas olbmot, bargojoavkkut, almmolaš doaibmit ja fitnodagat.
Čuozáhatdoarjaga sturrodat lea 500 €, 1 000 €, 1 500 € dahje 2 000 €. Viidát prográmmasisdoaluide sáhttá oažžut eanemustá 8 000 € čuozáhatdoarjaga. Dan lassin juohke ohcanjorrosis sáhttet válljet ovtta dahje guokte 20 000 € njunušfitnu.
Čuozáhatdoarjjaohcamuša árvvoštaladettiin váldet vuhtii čuovvovaš áššiid:
- Mii lea prográmma sisdoallu ja fáddá?
- Mii lea prográmma ođasvuohtaárvu?
- Mot prográmma ovddida searvevuođa dahje searvvušlašvuođa?
- Mot juvssahahttivuohta lea váldojuvvon vuhtii prográmmas?
- Mot prográmmas juhket dieđu čuozáhatjovkui?
- Mii lea prográmma eurohpálaš dimenšuvdna?
Ohcci ohcá čuozáhatdoarjaga Rimbert-vuogádaga bokte. Ohcci oažžu mearrádusa veahkkeruđas seammá vuogádaga bokte. Jus čuozáhatdoarjja mieđihuvvo, mearrádusa čuovusin bohtet dárbbašlaš rávvagat veahkkeruđa geavaheamis. Ovdasajis leat ohccit, geat eai vel leat ožžon doarjaga Oulu kulturfoanddas.
Čuozáhatdoarjaga sáhttá geavahit buot goluide, mat prográmmasisdoalu ollašuhttimis šaddet. Ohcci raportere čuozáhatdoarjaga geavaheamis guovtti (2) mánotbaji siste maŋimuš čuozáhatdoarjagiin ollašuhtton sisdoalu lágideamis.
Áigetávval
Ohcan lea rabas 2.9.2024–31.8.2025. Ohcan lea oktilaš, ja ohcamušaid váldet gieđahallamii njealji mánotbaji gaskkaid:
- 9.–31.12.2024 boahtán ohcamušat gieđahallojit ođđajagi-guovvamánu 2025 áigge.
- 1.–30.4.2025 boahtán ohcamušat gieđahallojit ođđajagi-guovvamánu 2025 áigge.
- 5.–31.8.2025 boahtán ohcamušat gieđahallojit ođđajagi-guovvamánu 2025 áigge.
Giellamolssaeavttut
Ohcanrávvagat leat oažžumis suomagillii, čielggosuomagillii, eaŋgalasgillii, ruoŧagillii, davvisámegillii, anárašgillii ja nuortalašgillii sihke seavagillii.
Ohcanskovi sáhttá deavdit suomagillii, eaŋgalasgillii, ruoŧagillii, davvisámegillii, anárašgillii ja nuortalašgillii.
Oulu kulturfoanddain gulahallet suomagillii, eaŋgalasgillii, ruoŧagillii ja davvisámegillii.
Mii beaividit suoma- ja eaŋgalasgielat siidduid olles ohcama áigge. Dárkkis áigeguovdilamos dieđuid dain siidduin.
Dávjá jerrojuvvon gažaldagat
Ovdal go deavdigoađát ohcamuša, loga dávjá jerrojuvvon gažaldagaid ja vástádusaid vulobealde. Oaččut dain buriid tipsaid, vai sáhtát jođáneappot deavdit skovi.
Gii sáhttá ohcat?
Ohccin sáhttet leat searvvit, foanddat, ovttaskas olbmot, bargojoavkkut, almmolaš doaibmit ja fitnodagat (vuoittu háhpohalakeahtes doaimmaide).
Sáhttágo vuolleahkásaš evttohit prográmma dahje ohcat čuozáhatdoarjaga?
Vuolleahkásaš sáhttá gal evttohit prográmma ja ohcat čuozáhatdoarjaga, muhto oktavuohtaolmmožin ja maiddái ovddasvástideaddjin ferte nammadit badjel 18-jahkásaš olbmo.
Mot Oulu2026-kulturprográmmii ohcet mielde?
Prográmmii sáhttá ohcat mielde elektrovnnalaš Rimbert-vuogádaga bokte. Dien vuogádaga bokte sáhtát maiddái ohcat čuozáhatdoarjaga evttohuvvon prográmma ollašuhttimii.
Masa čuozáhatdoarjaga sáhttá oažžut?
Čuozáhatdoarjaga sáhttá geavahit buot goluide, mat prográmmasisdoalu buvttadeamis šaddet. Doarjaga oažžu galgá ieš váldit čielgasa as, mot vejolaš doarjja váikkuha vearuhussii.
Ollugo veahkkeruhta lea juolludan láhkai?
Oulu kulturfoanda lea várren prográmmaohcama ollašuhttimii eanemustá 1 milj. euro. Dát sisttisdoallá Svenska Kulturfondenis ožžojuvvon veahkkeruđa ruoŧagiel prográmma ollašuhttimii ja Suoma Kulturruhtarájus ožžojuvvon veahkkeruđa sámeartisttaide. Juohke ohcanjorrosa várás dien supmis lea várrejuvvon sullii goalmmádas.
Gáibiduvvogo prográmmas iešruhtadeapmi?
Ii. Prográmma sisaboađut sáhttet boahtit vejolaš čuozáhatdoarjaga lassin máŋgga ruhtadangáldus, muhto prográmmaohcamis ii leat gáibádus iešruhtadeamis.
Gii mearrida prográmmasisdoaluid válljemis ja vállje čuozáhatdoarjaga oažžuid?
Ohcamušaid árvvoštallá Oulu kulturfoanddas nammaduvvon bargojoavku. Oulu kulturfoanda bivdá olggobeallásaš áššedovdiin veahki erenomážit ruoŧagielagiid ja sámeartisttaid ohcamušaid gieđahaladettiin. Veahkkeruđa oažžuin mearrida prográmmahoavda searvvušhoavda evttohusas.
Mii leat jo ovdal ožžon Oulu kulturfoanddas ruhtadeami. Sáhttitgo mii dattetge ohcat Mii leat kultuvra -čuozáhatdoarjaga?
Sáhttibehtet gal ohcat čuozáhatdoarjaga muhtun eará prográmma várás, muhto ovdasajis leat ohccit, geat eai vel leat ožžon ruhtadeami Oulu kulturfoanddas.
Mainna ákkain 2 500 – 8 000 € sturrosaš čuozáhatdoarjaga sáhttá ohcat?
Sáhtát ohcat 2 500 – 8 000 € sturrosaš čuozáhatdoarjaga, jus dat lea ákkastallamis prográmma bistima, kvalitehta, viidodaga, oassálastiid dahje riikkaidgaskasaš ovttasbarggu vuođul.
Maid njunušfidnu mearkkaša?
Juohke ohcanjorrosis sáhttet lassin válljet ovtta dahje guovtte njunušfitnu, mat ožžot 20 000 € doarjaga. Njunušfitnu ulbmilin lea ovddidit kulturdálkkádatnuppástusa erenomáš ja viiddes ládje. Njunušfidnu lea dihto čuozáhatjovkui oaivvilduvvon ollisvuohta, mii ovddida searvevuođa, searvvušlašvuođa dahje juvssahahttivuođa. Ohcamuša árvvoštaladettiin vihkkedallat prográmma sisdoalu ja viidodaga dán rádjái válljejuvvon kulturprográmma ektui. Jus ozat 20 000 € doarjaga njunušfidnui, lasit ohcamuša čuovusin dárkilut prošeaktaplána ja golloárvvoštallama.
Maid mearkkaša sosiálalaš ja ekologalaš ceavzilvuohta?
Sosiálalaš ceavzilvuohta mearkkaša ovdamearkka dihte olbmuid vejolašvuođaid váikkuhit iežaset eallimiidda ja searvvušlašvuhtii iežaset servošiin sihke dan, ahte buotlágan olbmot sáhttet oassálastit doaimmaide olggušteamis balakeahttá. Ekologalaš ceavzilvuohta mearkkaša ovdamearkka dihte dan, ahte dáhpáhusaid lágidettiin noađuhit birrasa nu uhcán go vejolaš. Buot Oulu2026-dáhpáhusat galget čuovvut birasustitlaš dáhpáhuslágideami rávvagiid ja dorvolut saji prinsihpaid, mat ráhkaduvvojit čavčča 2024 áigge.
Oaččungo sáddet máŋgga ohcamuša?
Sáhtát sáddet máŋgga ohcamuša prográmmaohcamii. Juohke ohcanjorrosa ohcamušat árvvoštallojuvvojit sierra prográmmaohcama kriteraid vuođul. Fuomáš, ahte galgat maid nagodit ollašuhttit buot iežat evttohusaid. Mii ávžžuhit ahte smiehtat ieš, mii lea diet erenomáš kulturoaivegávpotjagi sisdoallu, mainna don háliidat ohcalit kulturprográmma oassin.
Sáddejin iežan ohcamuša. Maid čuovvovažžan dáhpáhuvvá?
Giitu ohcamušas! Mii váldit ohcamušaid árvvoštallan láhkai 1.1.2025, 1.5.2025 ja 1.9.2025. Ohcamušaid árvvoštallá sierra nammaduvvon bargojoavku. Mearrádusat bohtet guovtti mánotbaji siste das, go gieđahallan lea álgán. Mearrádus sáddejuvvo prográmma oktavuohtaolbmo šleađgapostii. Mearrádusat eai ákkastallojuvvo.
Jus dus leat gažaldagat, sádde e-poastta:
Mii leat kultuvra -ideabargobájit
Ovttaveardásaš Oulu2026 -fidnu lágida čavčča 2024 áigge Teams-bargobájiid Mii leat kultuvra -prográmmaohcama birra. Guovtteoasat bargobájis oaččut tipssaid ja doarjaga prográmmaidea gárgeheapmái ja rávvagiid ohcamuša ráhkadeapmái. Bargobájis gieđahallet maiddái prográmma ollašuhttima juvssahahttivuhtii, searvevuhtii ja ovttaveardásašvuhtii laktáseaddji gažaldagaid.
Oza mielde!
